Sa herë më është dashur...

SA HERË MË ËSHTË DASHUR...

Sa herë më është dashur të bëj betime,

kam vënë në be kokën e nënës sime;

Kam vënë në be pa u trembur këtë truall,

këtë bukë që me lotë e kam gatuar;

këtë  këngë që e mbartja mbi supe si Sizifi,

e ma shembnin në humnera dhe e ngrija sërishmi.

Më është dashur të bëj be për dritën e syve të mi,

për nderin që të parët më janë bërë fli.

Për hapat që ime bijë sapo ka hedhur,

për vatrën ku zjarri i jetës rri i ndezur.

Më është dashur...dhe be të rëndë kam bërë

se rëndë më ka peshuar fjala e dhënë.

Dhe në se do të vdes pa e mbajtur fjalën,

si në baladë do të shihni të ringjallem.

1984